（前言： 1984年商業二台的節目監製朱明銳先生，對「百強84」有這兩篇的專業評論。）
好喜歡陳百強新大碟的唱片封面，蔚藍色的背景，襯托住一個古銅色皮膚的陳百強，俾人一種青春活力的動感，十分羨慕陳百強練得一手結實身材。早幾個月陳百強因為肝病入醫院的病容，已經一掃而去，封面及封底的陳百強比以前更加健康，更有男仕活力。
陳百強84在夏季出版，歌曲或者係要配合炎熱的氣溫，大部份係電子感好重的勁歌，但亦唔例外地有幾首情歌，畢竟陳百強以情歌取勝。陳百強今次擔正大旗，負責大碟策劃同監製工作，而大碟概念，係陳百強諗出，大碟屬 DANCE BEAT 路線，相信多少同 DANNY 自己喜歡跳舞有關，大碟頗多用電子樂器，時代感好重，而相信呢個現象亦係廣東歌趨勢，陳潔靈，張國榮等歌手亦唔會例外，跟追外國的 DANCE MUSIC 熱潮，歌曲處理上亦電子跳躍一番。
陳百強84大碟，開頭及結尾都係「閃電」一曲，開頭係一段迷幻的電子效果彈奏出鮑比達的作品「閃電」！而大碟完結就將「閃電」譜上歌詞，鄭國江用詞相當大胆，將男女狂熱的愛尖銳地描繪「強勁處像那雷電，光輝四閃，人似是觸電，能令妳欲醉欲仙」，印象中呢首歌係鄭國江描寫情愛最大胆露骨的作品。我始終唔明白陳百強點解會錄「創世記」呢首歌，陳百強相信係一個無宗教信仰的人，而創世記係聖經舊約第一章，敘述上帝創造世界的經過，而「創世記」呢首歌亦隱喻有一位全能的神創造宇宙，掌管萬事，喜歡其中幾句：「我身置他腳下，渺小似風裡沙，我奔進星際下，抬頭望他」，我覺得最尾果句應改為「抬頭仰望他」，因為縱使一個人成就幾大，在創造者眼裡只似沙粒一樣咁渺小。
「粉紅色的一生」係一首舊歌翻新，今次以 DANCE BEAT 加強節奏感，相當悅耳，鄭國江的詞十分開朗，「請張開美麗的心，將快樂來相分，為何自困」。整張大碟我唔喜歡「摘星」的樂曲編排，刻意製作成為雄壯但卻又似一首武俠劇主題曲，十分老套，「摘星」係84年禁毒主題曲，歌詞十分積極，屬於勵志作品。林振強用一個新方式道出毒品的禍害，鼓勵年青人要有更高志氣，有「摘星星」的夢想，「我要為我自豪，我要摘星，不做俘虜，星遠望似高，卻未算高，我定能摘到」。的確嘅，年青人有理想去努力，就會避開一些無聊的引誘，「摘星」呢首歌十分難唱。歌曲好多音轉接較突然，陳百強表現十分好，控掣得宜，唱腔類似羅文，從呢首歌的水進，陳百強歌藝進步良多，陳百強大碟仲有幾首歌都十分好，版位所限，留待下週再談，再見！
上星期在此欄內大讚陳百強練得一身好體型，昨日在電台走廊上就撞到大隻佬陳百強，見 DANNY 仔容光煥發，信心十足，讚 DANNY 兩句之後，DANNY 亦坦白話喜歡依家自己嘅身材，苦心鍛鍊終於有成。
百強84大碟的確係近期較熱門的廣東大碟，就電台播出次數之多就可知，「粉紅色的一生」係商台最多AIR PLAY 嘅，而港台就大力播「摘星」，相信係同禁毒演唱會有關。上期亦講過對 DANNY 大碟一點小意見，覺得 DANNY 在處理「摘星」呢首歌時有些少失策，樂曲編排老套不堪，破壞「摘星」的意境，呢番意見竟得到幾個朋友支持，同樣話前奏編排差。而同陳小寶傾談間，不約而同話喜歡 DANNY 嘅「畫出彩虹」，顧家煇的確是有新意表現，而歌詞亦有意思，好適合陳百強歌路。「瘋狂慶祝會」係林慕德另一首電子節拍加 FUNKY 嘅作品 ，林振強填詞走放任態度，歌詞簡單，用押韻方式講出對愛情的瘋狂，陳百強錄呢首歌聲線經過電子分音器，聲音有些少電子感，演唱時音域好短，類似林子祥嘅「愛到發燒」。「貓女人」嘅電結他表演十分出色，亦係一首 FUNKY 節奏，陳百強又一次試新歌路，數白欖式，似外國歌手嘅急口令歌唱。
「WILL YOU STILL LOVE ME TOMORROW」相信係好多老一輩樂迷喜愛的情歌，陳百強將呢首 CAROLE KING 嘅經典歌改為「你會否不再想起我」，歌曲以鋼琴同電結他相對奏，編排簡單但十分感人，林敏驄一向善長填浪漫嘅情歌，今次亦能捕捉戀人的心緒及從小動作中有深刻描寫，「雙手在膝低聲暗自私語，你會否不再想起我，與你感覺心興奮，你那咀角竟輕震。」陳百強頗能掌握感情的流放，係一首好動聽嘅情歌，聽呢首歌時亦幻想 DANNY 坐在鋼琴前自彈自唱嘅情境。日本詩人歌手谷村新司亦係擅長運用鋼琴做樂器的作曲家，「旅程」改自谷村新司嘅日本歌自然編排亦類似，鋼琴由頭貫穿整首歌，好靚。鄭國江既寫情又寫人生，有少少似當年徐小鳳嘅「風雨同路」。「快樂是緊握妳手，滔滔江水繼續流，人生之旅難退後，今天也許不見盡頭，要自由尋自我，那願隨流如木偶。」。「閃電」係大碟最後的一首歌，亦是同大碟開塲曲互相呼應嘅作品，歌詞大胆地描寫男女嘅情慾，相信係鄭國江較為大胆的作品。
聽完百強84呢張大碟，個人覺得陳百強歌唱技巧更進一步，歌唱方式亦更多變化，整張大碟嘗試走新派風格，但卻未能全部達到，樂曲編排係整張碟較弱，但百強84不失為一張好碟，一張商業價值好高嘅大碟。
CR2節目監製 朱明銳
（内文图片已省略）