1985 與偶像一起心情乍驚乍喜 陳百強為林青霞破例登台




  • 1985 與偶像一起心情乍驚乍喜 陳百強為林青霞破例登台 (文:芷靈)1

    1985 與偶像一起心情乍驚乍喜 陳百強為林青霞破例登台 (文:芷靈)2

    與偶像一起心情乍驚乍喜
    陳百強為林青霞破例登台

    DANNY仔是個脾氣怪怪的人,亦是一個完美的主義者,記得在無線十大勁歌金曲季選的當晚,他唱完得獎歌曲「等」之後,在錄映廠門外,極之不滿意的與我說:
    「衰到死,咁快出嚟,唔俾我繼續哼埋嗰幾個音,人地成首歌最有味道,就係臨尾哼哩幾句,阻住曬,我無理佢㗎,我照哼,哼到完為止。」
    可想而知,DANNY仔(陳百強)是個何等講求完美的人。
    其實,DANNY已經有好一段日子絕跡於幕前的表演,在他的演唱會之後,他去外地旅行也有一段日子,所以當晚他也有點兒緊張,在錄影廠門外,他問我:
    「點樣呀,我今晚哩套衫襯成點呀?」
    我真心稱讚他說:
    「好靚,全部都係最時興嘅配搭,不過最搶鏡重係你個心口針。」
    「係呀,我自己都好中意。」
    我一向都同意DANNY的講法,男孩子也一樣可以貪靚。
    「最近時裝店嘅生意好嘛?」
    「好,啲朋友好俾面,生意幾好,不過我都無乜錢賺嘅。」
    「講大話,生意好點會無錢賺喎!」
    「唔信,我俾本存摺你睇丫!人人都以為我屋企大把,其實我每個仙都係自己賺番嚟㗎,我根本就無錢。你都知我唔中意登台賺錢㗎啦。
    唱歌係我嘅興趣,我中意佢並唔係因為我要利用它成為我搵錢的工具。」
    「那你六月又去美國大西洋城登台?」
    他向我解釋說:
    「人家好有誠意,同我傾咗好耐,大大話傾咗成兩年,今次我唔去,似乎係好唔俾面人地咁。」
    今次,是DANNY第一次往大西洋城演唱,所以他心情極之興奮,他說事前一定會落足時間做好準備功夫。
    而這個演唱會,他更邀請到林青霞作特別嘉賓。
    「我好開心,因為林青霞一直係我好崇拜的偶像,能夠同佢合作,我心中簡直有講唔出的興奮。」他肉緊的說。
    目前,DANNY除了為六月往大西洋登台作準備外,他還積極地替華納灌錄他臨別的最後一張個人大碟。
    「你真係要離開華納?」
    他點點頭:
    「合久必分,好正常嘅事嚟啫。當然喺華納我唔係百分之一百開心,但係公司對我都好好,佢俾我很高的價錢。
    但係錢唔係我所渴望得到嘅嘢嚟,正如一張唱片佢地俾我分個三,你話同一蚊有乜嘢分別。
    哩三毫子你認為對我有影響咩,我根本就唔在乎,最重係,我自己認為值得。」
    「公司不能替你建立一個固定形象,而且你同CRYSTAL GAL嗰首歌,公司又無替你大力催谷過,會唔會係你離開華納的原因之一。」
    他坦白地說:
    「我可以好肯定講一句,哩兩件事的確喺其中兩個小小的原因,但他們並不代表全部。」
    「咁你打算效力邊一間唱片公司呢?外間一直話你去華星嘅成數最高。」我說。
    「我重未知道自己會去邊一間,因為現時有幾間唱片公司都同我傾。
    我想我會需要一段頗長嘅時間來考慮,然後作出選擇,我希望揀一間真正適合自己的唱片公司。
    到時我決定咗之後,我一定會第一時間告訴你!」
    一個有理想的人,自然會不斷前進,但願DANNY今次能夠作出一個正確的選擇來!

    芷靈


    資料提供:Kark
    文字錄入:小鬼