1989年初 陳百強大西洋城巧遇心中美女




  • 1989 陳百強大西洋城巧遇心中美女 cat

    陳百強到賭城——大西洋城登台,此次外出登台所揀的時間是聖誕節,故此,他工作辛苦之餘,亦趁此機會好好享受一個異國節日。

    圖片

    「我而家放開自己好多囉,以前,我去走埠登台,都好怕走出酒店大門,因怕俾歌迷纏住,不得其正咁會好冇癮。依家我已諗通佐喇,大家只不過歡迎我,先至會反應得咁熱情啫,自此,我去邊一度登台,都會抽出時間響個便玩番一日或半日,好過響酒店困住;睇住外邊風景唔去咁笨。」丹尼說。

    過往,丹尼有一種頗似自閉症的毛病,對於公開場合,總是避得就避,究其原因,因早年他太活躍,流連的士高跟朋友狂玩,久而久之便覺得沒啥意思。

    「或者,玩得多就厭啦,又或者睇到自己若再咁落去,咁不但會浪費生命,對自己擁有嘅嘢,會有啲唔公平。」

    「今次去到大西洋登台,聽聞你見到眼底中靚女李美鳳啊!」

    「係吖,幾好彩,我哋仲一齊食飯!」

    「兩個人響外邊嘆聖誕大餐,正吖!」

    「我幾時話過兩個人單獨食飯呀?我哋只係一齊食飯,嗰陣,仲有劉德華,吳婉芳,唐麗球響埋一齊㗎,千祈唔好亂寫,講我哋單獨約會至好。」

    原來,今年聖誕節到大西洋城登台的藝人不少,像先前提到的還有森森、羅銘偉一組,又有劉美君,陳德彰一班,大家在那邊碰上,可真夠樂了。

    「今次我去大西洋城登台,都算運氣不錯。」

    丹尼說,他和一班工作人員先到拉斯維加斯演出一晚,即飛過大西洋城演出廿四至廿六號三日四埸。

    「個間巴里賭場酒店,係陳超武響八七年俾美國政府要求查嘅一間,到八八年底証明佐冇事,於是搵我去登台,個度嘅場,可以坐成千人,亦得嗰邊華僑俾面,三日四場都告爆棚,冇令老闆失望。」

    另外,最叫丹尼認爲好彩的趁這次登台之便,他特別入賭場玩玩,倒也有趣。

    「初時,我認真黑仔,玩乜輸乜,輸成幾百蚊美金,跟住仲黑仔到連銀包都唔見埋,當時都唔知係跌佐吖,定俾人扒咗,個心悶到諗住返上房訓覺好過,嚇,突然有個警衛走埋嚟,話同我執到個銀包,因為裏面有我證件,又知我系響個間酒店唱歌,所以能夠即刻送番俾我,叫我簽收番,由嗰陣開始我轉咗運,玩乜贏乜,倒贏賭場百幾二百蚊美金添噃!」

    丹尼自然開心自己運程轉好,畢竟,人行起運來做甚麼也會格外順手的。
    文·伊仁


    資料提供:極品貓咪
    文字錄入:lh平安